Maung Lugay

1

Bul kukus mendung ka manggung

Ka manggung neda papayung

Neda jembar hampurana - hampurana

Lugay lungsur ka marcapada

Beak taun beak windu
Ngabandungan nyerangkeun ti kaanggangan

Lampahna paseuweu siwi – Pajajaran

2

Hasil meleng hasil ngimpleng

Anjogna sami ngahuleng

Tatar Sunda paburantak - paburantak

Rahayatna lara balangsak

Nu jadi marga lantaran

Patengtongan teu layeut jeung duduluran
Pagirang-girang tampian - Kokomoan

3

Poho ka purwa daksina

Jengglengan Sunda asalna

Midang ajeg ngalagena

Sakeclekna jeung sajeplasna

Sipat leungit tanpa lebih

Ngarakacak gegetna sedih jeung peurih

Nu matak rek makalangan – Gulung tangan

4

Lugay maung Pajajaran

Lumungsur ti patapaan

Ngalenghoy jeung gagauran

Sora eundeur tur handaruan

Bulu belang koneng loreng

Borongongong nyanggereng sihung ranggeteng

Socana herang moncorong – Neuteup merong

5

Taya karingrang kakeueung

Ulat teuneung daweung ludeung

Larak lirik duwang daweung

Nunggu-nunggu raga katineung

Neangan nu rek nunggangan

Sinatria raspati wanda ludeungan

Tedak Pajajaran asli - Siliwangi